Mbrëmjen e sotme, më 6 janar 2025, një tërmet me magnitudë 3.3 të shkallës Rihter ka tronditur veriun e Shqipërisë, duke u ndjerë edhe në disa zona të Kosovës. Sipas Qendrës Sizmologjike Evropiane-Mesdhetare (EMSC), tërmeti është regjistruar në orën 20:22 me epiqendër 9 kilometra në veri të qytetit të Kukësit, në një thellësi prej 10 kilometrash.
Lëkundjet janë ndjerë edhe 24 kilometra larg, në jugperëndim të Prizrenit, duke shkaktuar shqetësim mes banorëve të këtyre zonave. Raportimet nga qytetarët në Kukës, Prizren dhe zonat përreth tregojnë se tërmeti ka qenë i lehtë dhe nuk janë shënuar dëme materiale apo lëndime.
Autoritetet këshillojnë qytetarët të ruajnë qetësinë dhe të informohen vetëm nga burime zyrtare për çdo zhvillim të mëtejshëm.
Tërmetet me magnitudë të ulët, si ky i mbrëmshëm, janë të zakonshëm për rajonin e Ballkanit, i cili ndodhet në një zonë sizmike aktive. Ekspertët nënvizojnë se nuk ka vend për panik, por sugjerojnë që qytetarët të jenë të përgatitur për situata të ngjashme në të ardhmen
