Fitorja 0-4 ndaj Leçes, edhe pse është e 10-ta radhazi në kampionat dhe distanca me Juventusin është e madhe nuk e bëjnë të qetë trajnerin Simone Inzagi. Numri një i zikaltërve thotë se ekipi duhet të vazhdojë të punojë sepse ka ende mundësi për t’u përmirësuar.
“Sigurisht që mund të përmirësohemi sepse tani janë muajt më vendimtarë për të mbyllur sezonin. Është normale të jemi të lumtur sepse rrugëtimi është pozitiv, por tani është Atalanta. Nuk e konsideroj si një finale për titullin. Kemi nevojë për të gjithë për të vazhduar. Titulli? Sigurisht që nuk jam aspak i qetë. Ka shumë ndeshje dhe shumë pikë në dispozicion të të gjitha skuadrave. Blin pati një mundësi të mirë dhe duhet ta mbyllnim. Na duhet të shpenzojmë shumë energji në të gjitha aspektet”, ka thënë Inzagi.
Ai thotë se mori përgjigje pozitive nga të gjithë lojtarët që u aktivizuan në këtë sfidë, sidomos na sulmi.
“Sançez tregoi se është një lojtar i madh. Gjithmonë prezent dhe i gatshëm për të dhënë maksimumin. Lautaro? I kam thënë qe të jetë i qetë dhe të vazhdojë rrugëtimin pozitiv. Një lojtar që gjithmonë kërkon maksimumin nga skuadra dhe nga vetja”, përfundoi trajneri Inzagi.
