Lipjan, 2 korrik 2025 –
Shukri Buja është zyrtarizuar si kandidat i Partisë Demokratike të Kosovës (PDK) për kryetar të Komunës së Lipjanit në zgjedhjet lokale që do të mbahen më 12 tetor. Njoftimi është bërë publik gjatë një takimi me kryetarin e PDK-së, z. Memli Krasniqi, i cili konfirmoi përkrahjen e plotë për kandidaturën e Bujës.
Në një postim në Facebook, Buja theksoi se kandidatura e tij vjen si përgjigje ndaj kërkesës së qytetarëve për ndryshim, transparencë dhe efikasitet në qeverisje. Ai premtoi një lidership të afërt me qytetarin dhe të orientuar drejt projekteve konkrete që ndikojnë drejtpërdrejt në përmirësimin e jetës në komunën e Lipjanit.
“Lipjani ka nevojë për punë të vërtetë, projekte madhore dhe një lidership që nuk fshihet pas fjalëve. Unë nuk premtoj gjithçka, por atë që premtoj, e mbaj dhe e realizoj,” shkroi Buja.
Ai falënderoi kryetarin Memli Krasniqi, strukturat e degës së PDK-së në Lipjan, anëtarësinë dhe qytetarët që, sipas tij, i kanë dhënë besimin dhe motivin për të marrë këtë përgjegjësi të rëndësishme politike.
Kandidatura e Shukri Bujës pritet të dinamizojë garën zgjedhore në Lipjan, një komunë që kërkon zhvillim të qëndrueshëm, projekte infrastrukturore, mbështetje për të rinjtë dhe menaxhim më efikas të shërbimeve publike.
“Koha për të vepruar është tani!” – ky është mesazhi përmbyllës i kandidatit të PDK-së, që duket se synon të mobilizojë qytetarët për një kapitull të ri në udhëheqjen e komunës.
Zgjedhjet lokale të 12 tetorit pritet të sjellin një garë të fortë mes partive politike, ndërsa vëmendja është gjithnjë e më shumë e fokusuar te programet konkrete dhe kapaciteti i kandidatëve për të realizuar premtimet e dhëna.
