Lipjan, 7 shtator 2025 – Në kuadër të aktiviteteve parazgjedhore para nisjes së fushatës, dega e Lidhjes Demokratike të Kosovës (LDK) në Lipjan ka mbajtur një tubim madhështor me gratë. Ngjarja u zhvillua në një sallë të mbushur me qindra pjesëmarrëse, të cilat shprehën përkrahjen e tyre për vizionin e partisë.
Në këtë aktivitet, kryetari i Komunës së Lipjanit dhe njëherësh kryetar i LDK-së, dega në Lipjan, Imri Ahmeti, vlerësoi lart rolin e grave në shoqëri dhe politikë, duke i cilësuar ato si boshti i fitores së 12 tetorit.
“Me përkushtimin, vendosmërinë dhe besimin e tyre, mbështetja e grave është garancia që së bashku po ndërtojmë një Lipjan edhe më të zhvilluar”, tha Ahmeti në fjalën e tij para të pranishmeve.
Ai shtoi se gratë janë shtylla e familjes dhe se kontributi i tyre është i pazëvendësueshëm në çdo hap të përparimit të përbashkët:
“Ju falënderoj nga zemra për mbështetjen dhe kontributin e fuqishëm që jepni çdo ditë! Me ju, fitorja është e sigurt. Me ju, 12 tetori do të jetë festa jonë e përbashkët.”
Ky tubim shënon një nga ngjarjet më të mëdha të aktiviteteve parazgjedhore të LDK-së në Lipjan, duke paralajmëruar një mobilizim të gjerë të strukturave partiake para fushatës zyrtare.
