Kandidati për kryeministër nga Partia Demokratike e Kosovës, Bedri Hamza, ka zhvilluar sot një tubim elektoral me qytetarët e Lipjanit, ku ka prezantuar vizionin dhe prioritetet e tij për qeverisjen e ardhshme të vendit.
Para të pranishmëve, Hamza theksoi se Kosova nuk duhet të identifikohet me kriza të vazhdueshme politike, por me qytetarët e saj që punojnë, sakrifikojnë dhe meritojnë më shumë mundësi për zhvillim dhe mirëqenie.
“Kosova nuk është vend i krizave të pafundme. Kosova është vend i njerëzve që punojnë, sakrifikojnë dhe meritojnë më shumë”, deklaroi Hamza gjatë tubimit.
Ai u ndal veçanërisht te nevoja për ndryshim, duke theksuar se qytetarëve nuk mund t’u kërkohet më pritje dhe durim për zgjidhjen e problemeve me të cilat përballen çdo ditë.
“Sot, as në Lipjan dhe as askund tjetër në Kosovë, qytetarëve nuk mund t’u kërkohet më durim e pritje. Ndryshimi nuk mund të presë më dhe qytetarët po e kërkojnë atë tani”, u shpreh kandidati i PDK-së.
Gjatë takimit, Hamza foli edhe për nevojën e forcimit të ekonomisë, krijimit të vendeve të reja të punës dhe përmirësimit të kushteve të jetesës për qytetarët, duke kërkuar mbështetjen e votuesve në zgjedhjet e ardhshme.
Tubimi në Lipjan u zhvillua në kuadër të aktiviteteve elektorale të Partisë Demokratike të Kosovës për zgjedhjet parlamentare të 7 qershorit.
