Lipjan, 31 korrik 2025 – Një ditë e rëndësishme për komunën e Lipjanit: Kryetari i Komunës, Imri Ahmeti, ka nënshkruar sot kontratën për ndërtimin e një lagjeje të re, një projekt madhor që do të përfshijë rreth 100 njësi banesore, të dedikuara për familjet e dëshmorëve, veteranët dhe invalidët e luftës së UÇK-së.
Ky projekt do të shtrihet në një sipërfaqe prej 45,000 metrash katrorë dhe synon të ofrojë jo vetëm strehim modern dhe dinjitoz, por edhe qetësi dhe siguri për familjet që kanë dhënë shumë për lirinë e vendit.
“Jam i lumtur që sot nënshkruam kontratën për ndërtimin e lagjes së re, ku do të përfitojnë kategoritë e dala nga lufta!
Ky është një lajm i shkëlqyer për Lipjanin tonë, një projekt i madh që sjell mundësi për banim dhe dinjitet për ata që kanë dhënë shumë për vendin, por edhe për ata që kanë më shumë nevojë,” deklaroi kryetari Imri Ahmeti pas nënshkrimit.
Banesat do t’u jepen për shfrytëzim falas dhe afatgjatë familjeve përfituese, duke krijuar një hapësirë të re urbane që i shton vlerë komunës si në aspektin social, ashtu edhe në atë estetik.
“Po ndërtojmë një lagje të re, të bukur, me kushte moderne, që jo vetëm do t’i japë qytetit pamje më të mirë, por mbi të gjitha do të sjellë qetësi dhe siguri për shumë familje.
Ky është vetëm një hap tjetër në rrugën tonë të përkushtimit dhe punës konkrete,” shtoi Ahmeti.
Ky projekt reflekton përkushtimin institucional të Komunës së Lipjanit për të mbështetur kategoritë që kanë sakrifikuar më së shumti për vendin dhe për të ndërtuar një të ardhme më të mirë për të gjithë qytetarët.
Urime Lipjanit dhe të gjithë përfituesve!
Për më shumë lajme të ngjashme, qëndroni me Lipjan.info.
