Mungesa e gjumit është një problem serioz që duhet trajtuar sa më shpejt që të jetë e mundur. Mungesa e gjumit të mirë jua pakëson energjinë, ndikon në disponimin, shëndetin dhe aftësinë tuaj për të funksionuar siç duhet gjatë ditës.
Fëmijët kanë nevojë për të paktën 10 orë gjumë në ditë, adoleshentët kanë nevojë për 9 deri në 10 orë dhe të rriturit kanë nevojë për 7 deri në 8 orë gjumë të shëndetshëm.
Këtu janë disa faktorë përgjegjës për cilësinë e dobët të gjumit dhe çfarë duhet të shmangni për të shijuar përfitimet shëndetësore të gjumit të mirë.
Stresi
Sipas studimeve, stresi i tepërt është një nga shkaqet më të zakonshme që na bën të humbasim gjumin. Para se të shkoni në shtrat, lexoni një libër, dëgjoni muzikë relaksuese ose provoni meditimin dhe merrni frymë thellë për t’u çlodhur dhe për të fjetur më mirë.
Përdorimi i sendeve elektronike
Hulumtimet e fundit kanë treguar se drita blu e emetuar nga ekranet e televizorit dhe pajisjet e tjera elektronike redukton melatoninën, një hormon i rëndësishëm që kontrollon ciklin e gjumit, zgjimin dhe nxit gjumin. Përdorimi i tabletave, telefonave inteligjentë dhe pajisjeve të tjera elektronike ndikon dhe ndërpret gjumin. Për të shijuar një gjumë të mirë, fikni televizorin dhe laptopin të paktën një ose dy orë para gjumit. Lërini celularin dhe pajisjet e tjera larg nga shtrati të paktën një orë para gjumit. Gjithashtu, thuajuni miqve dhe kolegëve tuaj që të mos ju kontaktojnë pas një kohe të caktuar, përveç nëse është një rast urgjent.
Pirja e duhanit pak para gjumit
Duhanpirësit flenë më pak orë dhe përgjithësisht kanë gjumë më të keq se jo duhanpirësit, sipas një studimi të ri shkencor gjerman. Ai zbuloi se 17% e duhanpirësve flinin më pak se gjashtë orë çdo natë dhe 28% raportuan shqetësime të gjumit. Përqindjet korresponduese qartësisht më të ulëta për jo-duhanpirësit ishin 7% dhe 19%. Ndaloni duhanin para se të flini, pini cigaren e fundit të paktën 2 deri në 3 orë përpara.
Alkooli
Efektet negative të pirjes së alkoolit në gjumë theksohen nga shkencëtarët britanikë, pasi siç pretendojnë ata, pas 2 gotave mund të na zërë gjumi më lehtë, por gjumi nuk është as i qetë dhe as i këndshëm në fund.
Kafja
Kafeja përmban kafeinë e cila shkakton stimulim, dhe për pasojë ju vështirëson gjumin. Edhe më e lehta, nëse e pini pas orës 19, mund t’ju shkaktojë problem. Nëse nuk i rezistoni dot idesë së një kafeje pas darkës, atëherë preferoni një kafe pa kafe, e cila përmban një sasi minimale kafeine, pothuajse zero.
Kafshët shtëpiake
Një arsye për të mos bërë një gjumë të mirë gjatë natës është ndarja e një shtrati me një kafshë shtëpiake. Një studim i fundit i Mayo Clinic raporton se rreth gjysma e pronarëve të kafshëve shtëpiake që flinin me to përjetuan gjumë të shqetësuar në disa netë.
Ndryshimet hormonale
Sipas studimeve, gratë kanë më shumë gjasa se burrat të mos flenë mirë ose të vuajnë nga përgjumja gjatë ditës. Kjo është kryesisht për shkak të ndryshimeve hormonale në trup. Gratë janë më të prirura për cilësi të dobët të gjumit gjatë menstruacioneve, shtatzënisë dhe menopauzës.
Temperatura e dhomës
Nëse dhoma është shumë e ftohtë ose shumë e nxehtë, do të zgjoheni disa herë gjatë natës, duke prishur kështu ritmin normal të gjumit. Temperatura ideale e dhomës është midis 19-21 gradë Celsius.
Drita e ditës
Ekspozimi ndaj dritës artificiale (drita e dhomës) pas muzgut dhe para gjumit mund të zvogëlojë cilësinë e gjumit duke shtypur prodhimin e hormonit melatonin dhe mund të ketë efekte të tjera negative shëndetësore, sipas një studimi të ri.
