Lipjan, 5 mars 2024: Mbahet mbledhja e parë e KKSB-së për vitin 2024
Këshilli Komunal për Siguri në Bashkësi (KKSB) në Lipjan ka mbajtur sot mbledhjen e parë të vitit, ku u diskutua për gjendjen e sigurisë në komunën tonë.
Në takimin e sotëm, përfaqësuesi i shoqërisë civile, z. Bekim Krasniqi, ka shprehur shqetësimin e tij në lidhje me rritjen e dukurive negative në komunën tonë, duke përmendur rastet e therrjeve me thika ndaj nxënësve të shkollave të mesme. Ai kërkoi kontributin e KKSB-së në parandalimin e këtyre dukurive negative.
Kryetari i Komunës së Lipjanit, z. Imri Ahmeti, propozoi që të zhvillohet një orë vetdijesuese kundër dukurive negative në të gjitha shkollat e komunës, propozim ky që u miratua nga të gjithë anëtarët e KKSB-së.
Komandanti i Stacionit Policor, Argjent Gashi, në takimin e sotëm vlerësoi se gjendja e sigurisë në komunën e Lipjanit është e mirë dhe po kërkoi angazhim të vazhdueshëm nga të gjithë qytetarët për të mbajtur situatën e qetë dhe stabile.
Në këtë mbledhje, u diskutua gjithashtu për punën e bërë nga KKSB-ja gjatë vitit 2023, si dhe u prezantua plani i punës për vitin 2024.
Në përfundim, anëtarët e KKSB-së prezantuan shqetësime të identifikuara nga qytetarët, lidhur me sigurinë publike, duke theksuar nevojën për të punuar së bashku për rritjen e sigurisë në komunën tonë.
