Armend Grajqevci ka zyrtarizuar kandidaturën e tij për deputet në listën e Lidhja Demokratike e Kosovës për zgjedhjet e ardhshme parlamentare, duke e cilësuar këtë hap si vazhdim të angazhimit të tij politik dhe qytetar në shërbim të vendit.
I njohur për aktivitetin e tij politik dhe përfaqësimin lokal, Grajqevci vjen në këtë garë pasi ka fituar dy mandate si asambleist komunal, ndërsa aktualisht ushtron edhe funksionin e kryetarit të Forumit Rinor të degës së LDK-së. Ai konsiderohet si një nga zërat e rinj politikë që synon të sjellë energji, përkushtim dhe vizion të ri në institucionet qendrore të Kosovës.
Në deklarimin e tij publik, Grajqevci ka theksuar se kandidatura e tij nuk përfaqëson privilegj personal, por përgjegjësi ndaj qytetarëve dhe shtetit.
“Të shohësh vendin tënd teksa kalon procese të vështira politike e institucionale, nuk mund të më gjejë ndryshe veçse në shërbim të tij. E marr këtë përgjegjësi me vetëdije të plotë se nuk është privilegj për veten, por detyrim për qytetarët”, është shprehur ai.
Duke vlerësuar rrugëtimin e tij politik brenda Lidhja Demokratike e Kosovës, Grajqevci ka potencuar se LDK-ja mbetet adresa ku ai ka formuar identitetin e tij politik dhe vizionin për shtetndërtimin.
“Askund nuk mund t’i shërbej më mirë vendit sesa në vatrën e lirisë, pavarësisë dhe ndërtimit të republikës”, ka deklaruar ai.
Me fokus tek rinia, përfaqësimi qytetar dhe forcimi i institucioneve, Armend Grajqevci synon që përmes Kuvendit të Kosovës të kontribuojë në zhvillimin politik dhe shoqëror të vendit, duke premtuar zë aktiv për interesat e qytetarëve.
Në fund të mesazhit të tij, ai ka falënderuar strukturat e degës për besimin e dhënë, ndërsa ka kërkuar mbështetjen e qytetarëve në këtë rrugëtim politik.
“Me besim në Zot, familje dhe shtet, e nisi këtë rrugëtim me bindjen se Kosova meriton dhe do të bëhet më mirë”, ka përfunduar Grajqevci.
